பிரபாகரனிடம் சீமான் ஆயுதப்பயிற்சி எடுத்ததாக சொல்வது பொய்: இலங்கை புகைப்பட கலைஞர் அமரதாஸ் பரபரப்பு பேட்டி…!

பிரபாகரனிடம் சீமான் ஆயுதப்பயிற்சி எடுத்ததாக சொல்வது பொய்: இலங்கை புகைப்பட கலைஞர் அமரதாஸ் பரபரப்பு பேட்டி…!

இலங்கையில், எல்லாளன் ஆவணப்பட படப்பிடிப்பின் போது துப்பாக்கிகளை வைத்திருப்பது போல எடுக்கப்பட்ட போட்டோக்களை, பிரபாகரனுடன் தான் ஆயுத பயிற்சி எடுத்ததாக சீமான் பொய்யான கட்டுக் கதைகளை பரப்பி வருவதாக இலங்கை புகைப்படக் கலைஞர் அமரதாஸ் கூறியிருப்பது தமிழக அரசியலில் பரபரப்பை ஏற்படுத்தியுள்ளது..!

புகைப்பட கலைஞர் அமரதாஸ் இதுகுறித்து நிருபருக்கு அளித்த பேட்டியில் கூறியதாவது: விடுதலைப் புலிகள் இயக்கத்தால் எல்லாளன் என்ற திரைப்படத்தின் ஸ்டில் போட்டோகிராபராக நான் பணியாற்றினேன். 2008ம் ஆண்டு ஆனைஇரவு முகாமில் இருந்து சில கிலோ மீட்டர் தொலைவில் உள்ள பகுதியில் இந்த திரைப்படம் படமாக்கப்பட்டது. துப்பாக்கிகள் மீது பிரியப்பட்ட சீமான் அப்போது திரைப்பட இயக்குநராக ஈழத்துக்கு வந்திருந்தார்.இரண்டு,மூன்று நாட்கள் எல்லாளன் திரைப்படத்தின் படப்பிடிப்பு தளத்துக்கும்,சீமான் வந்தார். அங்கே இருந்த நவீன ரக துப்பாக்கிகள் மீது சீமானுக்கு அலாதியான பிரியம் இருந்தது. இதனால் அவற்றை வைத்து போட்டோ எடுக்க வேண்டும் என விரும்பினார். நான்தான் அந்தப் படங்களை எடுத்தேன். அந்தப் படத்தின் ஸ்டில் போட்டோகிராபராக நான் பணியாற்றும் போட்டோக்களும் இருக்கின்றன.சூட்டிங் போட்டோ எடுத்தது நான்தான். பிரபாகரன் தமக்கு ஆயுதப் பயிற்சி கொடுத்த போது எடுத்த படங்கள் என தமிழ்நாட்டில் சீமான் வெளியிட்டிருப்பவை அனைத்தும் என்னால் எல்லாளன் திரைப்பட படப்பிடிப்பில் எடுக்கப்பட்டவைதான்.

இது ஒரு மோசடியான விஷயம். சீமான் நவீன ஆயுதங்களை வைத்திருக்கும் படங்களை உற்று நோக்கினால் சினிமா படப்பிடிப்புகளில் பயன்படுத்தக் கூடிய தெர்மாகோல் சீமானின் பின்னால் இருக்கும். அதேபோல சீமான் துப்பாக்கி ஒன்றை தமது கை இடுக்கில் வைத்திருப்பார். பொதுவாக ஆயுதங்களைக் கையாள்வதற்கு என ஒரு முறை இருக்கிறது சீமான் பிடித்திருப்பது போல கை இடுக்கில் வைத்துக் கொண்டு எல்லாம் சுட்டு விடவும் முடியாது.